【本節目由文化部影視及流行音樂產業局補助播出】 *王金選老師&主持人張堯
《秋季的囝仔歌》〈一日〉
一日一日更一日，一日一日更一日，又更是禮拜日。一日過一日，一二三四五六七，算及七，就是禮拜日。
《春季的囝仔歌》〈一個月〉
一個月、一個月，一個月一個月一直過，一個月一個月 又更過，十二個月又更過，大家又更加一歲。
《秋季的囝仔歌》、《春季的囝仔歌》國語日報社出版
《冬季的囝仔歌》〈下晡〉
下晡若好天，下晡咱就去放風箏，順勢看蜻蛉，下晡若敗天，下晡咱就在次學寫字，明仔哉的功課乃準備。
《秋季的囝仔歌》〈黃昏〉
黃昏，日頭欲落山，黃昏，天色漸漸暗，黃昏─路燈一葩一葩著，黃昏─阿母暗頓煮竟桌。
《冬季的囝仔歌》、《秋季的囝仔歌》國語日報社出版
《冬季的囝仔歌》〈早時〉
懶惰吉仔誠懶惰，早時睏也有夠晏。早時睏若晏？早時睏及十點半，早時大家去趴山，僅單伊猶在攬被單。
《冬季的囝仔歌》〈中晝〉
中晝中晝，大家腹肚枵，有人中晝食水餃，有人中晝食飯包，有人中晝食鹹粿，中晝食飽纔來睏中晝。
《冬季的囝仔歌》國語日報社出版
《秋季的囝仔歌》〈厚‧薄〉
厚衫帶一領，薄衫帶一領，天氣若熱 穿薄衫，天氣若寒 套厚衫。
《秋季的囝仔歌》〈粗‧細〉
粗粗的石頭 刻一隻猴，細細的石頭 刻菜頭，刻粗石頭、刻細石頭，吾二伯，攏誠敖。
《秋季的囝仔歌》國語日報社出版
《夏季的囝仔歌》〈芳‧臭〉
芳花芳芳、芳瓜芳芳，芳水也芳芳，鼻著芳味人輕鬆。臭水臭臭、臭龜仔臭臭，臭屁也臭臭，大家鼻著起腳走。
《秋季的囝仔歌》〈新‧舊〉
新衫新褲新皮鞋，新枕頭、新棉被，攏是阿母新買的，舊衫舊褲舊布鞋，舊枕頭、舊棉被，想看欲送去何位？
《秋季的囝仔歌》、《夏季的囝仔歌》國語日報社出版
《冬季的囝仔歌》〈都市‧莊下〉
都市誠多樓仔，城市誠多車。莊下誠多樹仔，莊下誠多山。莊下的人愛去都市。都市的人愛去莊下。
《冬季的囝仔歌》〈高‧低〉
雀鳥仔，有夠多，在樹仔頂跳高跳低。此隻跳高、彼隻跳低，彼隻跳高、此隻跳低，低低高高、高高低低，尹豈是在避相尋。
《冬季的囝仔歌》國語日報社出版
《點心攤》〈米苔目〉
大頭富仔 大頭殼，一二三四 不曉讀，後擺大漢 欲做啥？伊講欲去賣虛囉 米苔目。
《點心攤》〈鼎邊銼〉
阿土阿土遊玩，看到菜市場仔口，一攤鼎邊銼，鼎邊銼，氣味好，阿土哪吃哪稱讚，順煞包一碗，提轉去乎因阿祖。
《點心攤》台灣麥克出版
《點心攤》〈担仔麵〉
燒燙燙，香貢貢，担仔麵，歸碗公，阿通哪吃哪歕風；歕風呼呼叫，吃麵嗽嗽叫，大家哪看哪愛笑。
《點心攤》〈什菜麵〉
什菜麵，全全菜，有麵有菜真澎派：滷蛋豆干高麗菜，瘦肉花枝蝦仔及鹹菜，這碗麵，我上愛。
《點心攤》台灣麥克出版
《點心攤》〈蚵仔麵線〉
阿婆在賣蚵仔麵線，一碗才賣七塊半，大家趕緊走來看，看看咧，閣有影，拄好鹹，拄好淡，一下仔子，阿婆就賣五大鼎。
《點心攤》〈臭豆腐〉
臭豆腐，攙泡菜，阿明仔，伊上愛。臭豆腐，香香閣臭臭，吃三盤，伊也閣嫌無夠。
《點心攤》台灣麥克出版
《肥豬齁齁叫》〈目睭花花〉
目睭花花，蟾蜍看做水蛙；目睭花花，粉鳥看做密婆；目睭霧霧，猴山仔看做是阿舅。
《肥豬齁齁叫》〈鸚哥鳥〉
鸚哥鳥，鸚哥鳥，嘴曲曲，頭殼巧，學人講話，逐句攏會曉，我講一二三四五，伊講五六七八九。
《肥豬齁齁叫》格林文化出版社出版
《春季的囝仔歌》〈嬰仔〉
嬰仔嬰仔愛人搖，嬰仔嬰仔愛人惜，嬰仔嬰仔─腹肚若枵就哇哇叫，嬰仔嬰仔─若食飽，伊就笑。
《春季的囝仔歌》〈燕仔〉
春風輕輕仔吹，燕仔燕仔四界飛。燕仔燕仔穿烏衫，燕仔燕仔尾開叉，燕仔飛來更飛去，燕仔飛高更飛低。
《春季的囝仔歌》國語日報社出版
《春季的囝仔歌》〈桃花〉
桃花桃花 誠多欉，桃花若開 粉紅仔粉紅，桃花開也誠大片，竟個春天，誠迷人。
《紅龜粿》〈一隻蝶仔〉
一隻蝶仔，兩隻蜂，三隻蒼蠅，四隻蚊，相招欲香港，飛五工，煞飛去台中港。
《春季的囝仔歌》國語日報社出版、《紅龜粿》信誼基金出版社出版
《夏季的囝仔歌》〈日頭花〉
日頭花，若日頭，日頭花，愛看日頭；日頭若在此頭，日頭花就看此頭；日頭若在彼頭，日頭花就看彼頭。
《夏季的囝仔歌》〈蓮花〉
次前一窟蓮花池，蓮花開也滿滿是；蓮花一蕊更一蕊，近百蕊、近千蕊，蓮花有夠多，蓮花有夠秀。
《夏季的囝仔歌》國語日報社出版
《春季的囝仔歌》〈油桐花〉
油桐花，花白白，油桐花，花細細，風若吹─油桐花，落誠多，一蕊一蕊落了地，若像在落雪。
《春季的囝仔歌》〈圓仔花〉
圓仔花，在何位？公園內，種誠多；圓仔花，種在茲，圓仔花，種在彼；圓仔花，若圓仔，會當看，未當食。
《春季的囝仔歌》國語日報社出版
《指甲花》〈指甲花〉
番鴨 番鴨，挽指甲花擦指甲；擦腳盤，擦腳縫，歸隻腳，紅紅紅。
《指甲花》〈見笑草〉
見笑草，驚歹勢，摸一下，葉仔就合做伙，頭殼就低低低。
《指甲花》信誼基金出版社出版
《指甲花》〈挽芭樂〉
猴仔帶猴仔，偷挽芭樂，芭樂欉，躲一尾蟲，猴仔經一咧顛倒迸，尻穿頓一咧變兩爿。
《指甲花》〈挵檨仔〉
稍許酸，稍許甜，土檨仔在大路邊，囝仔竹篙舉一枝，金金相，頭敧敧，要挵三粒來做鹹酸甜。
《指甲花》信誼基金出版社出版
《冬季的囝仔歌》〈木瓜〉
木瓜木瓜 種在吾次邊，木瓜木瓜 高高及半天，木瓜逐粒青青青，後來變黃黃、變甜甜。
《冬季的囝仔歌》〈柳丁〉
阿清阿清，阿清愛食柳丁，柳丁抗也竟次間，朋友若來，阿清攏請尹食柳丁，大家也變也愛食柳丁。
《冬季的囝仔歌》國語日報社出版
《春季的囝仔歌》〈蘋果〉
青青的蘋果，紅紅的蘋果，甜甜的蘋果，脆脆的蘋果，好看的蘋果，好食的蘋果。
《春季的囝仔歌》〈枇杷〉
枇杷園，種枇杷，枇杷樹，生枇杷。枇杷一頭大一頭細，更有金黃色的皮。枇杷誠多汁，甜蜜蜜，攏不澀。
《春季的囝仔歌》國語日報社出版
《指甲花》〈心適歌〉
第一心適，猴山仔種麻竹；第二心適，麻竹煞變紅色；第三心適，原來是一枝紅蠟燭；上介心適，紅蠟燭摕來點紅送阿叔。
《夏季的囝仔歌》〈檳榔樹〉
檳榔樹，誠大欉，伊合椰子樹無啥仝。檳榔樹，生檳榔，一欉幾粒誠叵算。檳榔樹有的種在山頂，有的種在檳榔園。
《指甲花》信誼基金出版社出版、《夏季的囝仔歌》國語日報社出版
《夏季的囝仔歌》〈竹仔〉
竹仔竹仔定定定，竹仔竹仔誠好用。竹仔做門，竹仔做眠床，竹仔做椅仔，竹仔也會當做籠床。
《指甲花》〈甘蔗〉
甘蔗皮 黑漉漉，甘蔗墨 硬确确，甘蔗長趠趠，看起來像竹篙，齧甘蔗，免用甘蔗刀，吃甘蔗，着呸甘蔗粕。
《夏季的囝仔歌》國語日報社出版、《指甲花》信誼基金出版社出版
《秋季的囝仔歌》〈目鏡‧錶仔〉
我有一副目鏡，我有一粒錶仔。錶仔掛乎好，目鏡掛乎正，阿爸欲率我，去荷人請。
《春季的囝仔歌》〈膨椅‧地毯〉
此組膨椅、此領地毯，看起來誠好。彼領地毯、彼組膨椅，看起來誠秀。若欲買膨椅、買地毯，不知要開幾萬？
《秋季的囝仔歌》、《春季的囝仔歌》國語日報社出版
《秋季的囝仔歌》〈掃帚‧畚箕〉
你先用掃帚 給坌掃掃一堆，我用掃帚給坌掃 掃入去畚箕，有掃帚，有畚箕，四界攏誠清潔。
《秋季的囝仔歌》〈坌掃車〉
坌掃車、坌掃車，叮叮噹噹會唱歌。坌掃車、坌掃車，街仔路，四界行。坌掃車，嘴闊闊，坌掃伊上愛食。
《秋季的囝仔歌》國語日報社出版
《秋季的囝仔歌》〈電火‧電線〉
緊來看、緊來看，水電師父 在兜電火、牽電線，此粒電火接彼條電線，彼個開關接此條電線，電火又更光又更好看。
《夏季的囝仔歌》〈電鍋‧電子鍋〉
用電鍋煮飯，用電子鍋炊蛋；電鍋、電子鍋 攏總要插電，電鍋誠方便，電子鍋也誠方便。
《秋季的囝仔歌》、《夏季的囝仔歌》國語日報社出版
《夏季的囝仔歌》〈熱水器〉
熱水器，誠利便，有的熱水器焚瓦斯，有的熱水器要著電；熱水器，焚燒水，洗身軀、洗腳腿，清潔囝仔上婐媠。
《冬季的囝仔歌》〈洗髮精〉
阿英阿英 去買洗髮精，洗髮精，抗諸浴間，洗髮精，大家公家用；洗髮精一罐一罐芳芳，洗頭毛洗也鬆鬆鬆。
《夏季的囝仔歌》、《冬季的囝仔歌》國語日報社出版
《春季的囝仔歌》〈洗衫粉〉
洗衫粉提來洗衫，洗衫粉 提來洗被單，洗衫粉誠多泡。洗衫機洗衫、洗被單，也洗厚、也洗薄。
《冬季的囝仔歌》〈衫仔廚〉
衫仔廚誠好看，衫仔廚有一面鏡，我開衫仔廚提衫，乃換衫、乃照鏡，嗯─此領外衫誠好看。
《春季的囝仔歌》、《冬季的囝仔歌》國語日報社出版
《夏季的囝仔歌》〈襪仔〉
一個袋仔貯藏誠多襪仔，長襪仔、短襪仔，黑襪仔、白襪仔，紅襪仔、花襪仔，此個袋仔的形 是大大大的襪仔。
《夏季的囝仔歌》〈木屐‧拖仔〉
一個囝仔誠趣味，一腳穿木屐、一腳穿拖仔，其阿嬤，叫伊換，伊講不免換不免換，一腳木屐、一腳拖仔，也是誠好看。
《夏季的囝仔歌》國語日報社出版
《春季的囝仔歌》〈喙〉
喙會食飯，喙會啉茶，喙會講話，也有人的喙，學鳥仔講話，更會歕鼓吹。
《秋季的囝仔歌》〈喙齒〉
齒科醫生 給我看喙齒，講我的喙齒誠秀，只是有一齒蛀齒，伊給我補喙齒，叫我後擺要接洗喙。
《春季的囝仔歌》、《秋季的囝仔歌》國語日報社出版
《夏季的囝仔歌》〈木耳〉
木耳木耳，發在柴棵頂面，若像咱的雙邊耳。木耳一枚一枚，木耳炒薑絲，阿嬤上合意。
《夏季的囝仔歌》〈耳仔〉
耳仔耳仔恬恬聽，彼是什麼聲？耳仔耳仔恬恬聽，彼是溪仔水在唱歌，溪水有時辰攏無聲，有時辰，足大聲。
《夏季的囝仔歌》國語日報社出版
《夏季的囝仔歌》〈腰〉
大姑大姑 腰粗粗，二姑二姑 腰大魁，三姑的腰 若像一個游泳圈。
《冬季的囝仔歌》〈指頭仔〉
指頭仔，有十支，指頭仔，若兄弟。指頭仔會曉舉箸食麵，指頭仔會曉舉筆寫字。十支指頭仔，會曉做誠多大事。
《夏季的囝仔歌》、《冬季的囝仔歌》國語日報社出版
《冬季的囝仔歌》〈象〉
大象大象諸大魁，洗身軀 豈要用一箱茶塊？大象大象鼻仔長，若欲睏 豈要用五張大眠床？
《夏季的囝仔歌》〈身軀〉
大象、大象，身軀大大魁，身軀粗粗粗，大象身軀若烏烏，大象去洗身軀，豈要用三箱茶顆。
《夏季的囝仔歌》、《冬季的囝仔歌》國語日報社出版
《紅龜粿》〈金魚〉
金魚 金魚，翹嘴唇，穿一領絲仔裙，歸工目睭金金，不知是咧睏，還是咧看船？
《夏季囝仔歌》〈海豬仔〉
海豬仔海豬仔不是豬，海豬仔海豬仔誠婐媠；海豬仔海豬仔敖泅水，海豬仔表演誠趣味，上愛看的是吾小弟。
《紅龜粿》信誼基金出版社出版、《夏季囝仔歌》國語日報社出版
《冬季的囝仔歌》〈鱷魚〉
鱷魚鱷魚，喙齒尖尖喙大大，鱷魚鱷魚，愛食魚仔愛食肉，鱷魚恬恬匐在彼，我也愛看也會驚。
《冬季的囝仔歌》〈龜〉
一隻龜，兩隻龜，三隻龜，水池仔內有三隻龜，三隻龜有時辰在肫龜，三隻龜有時辰洗身軀。
《冬季的囝仔歌》國語日報社出版
《紅龜粿》〈露螺〉
露螺 露螺，無腳會爬，無手會啉茶，有眠床，無棉被，有厝無土地，一間厝背咧戇戇旋。
《紅龜粿》〈水蛙厚話〉
水蛙水蛙，見面厚話，講阮大姊，講恁小妹，講東講西，講天講地，愈講愈花，愈講愈多。
《紅龜粿》信誼基金出版社出版
《紅龜粿》〈金龜〉
金龜 金龜，曲痀 曲痀，身軀若龜，不企會踞，飛去樹仔頂，食飽就盹痀。
《紅龜粿》〈蟬〉
一隻蟬，大舌大舌，一二三四，算不離，卡算攏是「一一一……」。
《紅龜粿》信誼基金出版社出版
《紅龜粿》〈螞蟻徒位〉
螞蟻巢，欲徒位，出門帶棕簑，棕簑無地借，舉一枝芋仔葉，雨來澆不著。
《秋季的囝仔歌》〈家蚻〉
家蚻家蚻六支腳，家蚻時常四界行；家蚻會趴壁，家蚻會偷食，家蚻有時避諸櫥仔下，家蚻有時徐入吾灶下。
《紅龜粿》信誼基金出版社出版、《秋季的囝仔歌》國語日報社出版
《紅龜粿》〈老鼠〉
老鼠 老鼠，三更半暝 偷食米，食著芭樂籽，嘴齒落三齒。
《秋季的囝仔歌》〈鳥鼠〉
鳥鼠鳥鼠長尾閣，鳥鼠鳥鼠尖喙齒，鳥鼠鳥鼠 偷食瓜籽，鳥鼠聽著貓仔聲，就趕緊走去避。
《紅龜粿》信誼基金出版社出版、《秋季的囝仔歌》國語日報社出版
《肥豬齁齁叫》〈一陣虎〉
樹林內，一陣虎，一隻瘦比巴，一隻大腹肚；一隻面膨膨，一隻面脯脯；一隻尾溜長長長，一隻腳骨粗粗粗，攏在樹下吃肉酥。
《肥豬齁齁叫》〈黑猩猩〉
黑猩猩，衫黑黑，走去挖蕃薯塊；羊咩咩，衫白白，走去拗番麥；紅毛蟹，衫紅紅，走去剪布帆；水蛙衫青青，跳著跳著跳去溝仔邊。
《肥豬齁齁叫》格林文化出版社出版
《肥豬齁齁叫》〈肥豬齁齁叫〉
這隻豬，敖吃餿，一工愛吃百外斤，齁齁叫，一直吞，豬槽仔肉，剩菜剩湯 吃甲攏無春。
《肥豬齁齁叫》〈大豬公〉
大豬公，穿皮鞋，透早賣清糜，半晡賣紅茶；中晝做豆花，下晡種木瓜；欲暗仔賣碗粿，暗時夜市賣甜粿，三更半暝閣去修理電火。
《肥豬齁齁叫》格林文化出版社出版
《紅龜粿》〈大水牛〉
大水牛，講話大大聲，觸人痛痛痛，白翎鷥，攏不驚，爬起伊的胛脊背。
《肥豬齁齁叫》〈憨水牛〉
憨水牛，叩叩闖，追鵝追甲 攙大象相碰，碰一咧頭殼煞暈暈，暈暈暈暈變閣卡憨，看著塑膠管，就欲掠狂。
《紅龜粿》信誼基金出版社出版、《肥豬齁齁叫》格林文化出版社出版
《夏季的囝仔歌》〈前後左右〉
頭前種蘭花，後壁種桂花，左右兩邊 種玫瑰、種菊花，風若一下吹，前後左右芳味四界飛。
《夏季的囝仔歌》〈東西南北〉
東邊種冬瓜，西邊種西瓜，南邊種金瓜，北邊種木瓜，中央種一寡，匏仔合菜瓜。
《夏季的囝仔歌》國語日報社出版
《春季的囝仔歌》〈圓‧扁〉
紅圓仔，圓圓，白圓仔，也圓圓，圓仔圓仔搓圓圓。肉餅，扁扁，酥餅，也扁扁，大家食也誠歡喜。
《春季的囝仔歌》〈直‧曲〉
竹仔枝，直直，直直若像一枝筆，直直若像一字「一」。柳樹枝，曲曲，是不是風來給調，無哪會變曲曲？
《春季的囝仔歌》國語日報社出版
《秋季的囝仔歌》〈雨傘〉
天烏烏，落大雨，緊舉雨傘來遮雨，雨傘雨傘，有青有花也有鳥，若像秀秀的花，一蕊一蕊開在大車路。
《冬季的囝仔歌》〈雨衣‧雨鞋〉
黃雨衣，黃黃黃，黃雨鞋，黃黃黃，雨衣、雨鞋壁邊抗，落雨天，誠好用，雨衣、雨鞋穿好纔出門。
《秋季的囝仔歌》、《冬季的囝仔歌》國語日報社出版
《肥豬齁齁叫》〈虎姑婆〉
虎姑婆，好嘴斗，一粒肉包，兩塊麻荖，三碗爌肉，四盤水餃，五條俗粄，六桶仙草，七分鐘就吃了了。
《肥豬齁齁叫》〈狐狸子〉
狐狸子，偷吃餅，肉餅油律律，吃肉骨；肉骨硬倥倥，吃便當；便當冷枝枝，吃花枝；花枝韌脯脯，吃甲欲吐欲吐。
《肥豬齁齁叫》格林文化出版
《點心攤》〈吃肉丸〉
人高高，來吃肉丸；人矮矮，來吃碗粿；人巧巧，來吃水餃；人憨憨，行路都會甲人相碰。
《點心攤》〈肉粽〉
米QQ，葉香香，蛋仁土豆栗子，鬆鬆─ 蝦米精肉蔥頭，香香─ 這攤的肉粽上介香。
《點心攤》台灣麥克股份有限公司出版
《夏季的囝仔歌》〈跳索仔〉
阿兄阿兄，誠敖跳索仔，阿兄教我跳索仔。我學一下仔，也會曉跳索仔，我合阿兄做陣跳索仔。
《夏季的囝仔歌》〈牛奶‧米奶〉
阿兄愛啉牛奶，阿姊愛啉米奶，我上愛啉豆奶。阿爸講此款店，咱也來開一間，來賣牛奶米奶合豆奶。
《夏季的囝仔歌》國語日報社出版
《春季的囝仔歌》〈咱〉
咱來去山頂，咱來去山頂，唱歌、看風景，順勢挽龍眼，龍眼若挽遂，咱更來去食冰。
《秋季的囝仔歌》〈尹〉
尹送咱芳花，咱送尹木瓜，尹送咱番麥，咱送尹枇杷。尹請咱啉紅茶，咱請飲食鹹糜。
《春季的囝仔歌》、《秋季的囝仔歌》國語日報社出版
《春季的囝仔歌》〈吾‧我〉
吾阿爸，在送批，吾阿母，在種花。我今年，纔七歲，我上愛，食木瓜。我會曉家己穿布鞋，我會曉家己摺棉被。
《夏季的囝仔歌》〈您〉
您欲去何位？您欲做啥麼？你若欲去炕番薯，我就逮您去；你欲去捊金魚，我就無欲逮您去。
《春季的囝仔歌》、《夏季的囝仔歌》國語日報社
《肥豬齁齁叫》〈趣味歌〉
趣味歌，真趣味，兔仔賣粉圓，猴山仔賣紅柿；厝尾頂，貓仔咧烘魚，老鼠值咧爌蕃薯。
《肥豬齁齁叫》〈不得了〉
不得了囉，不得了！你牽牛 我牽狗 伊牽一隻大粉鳥；粉鳥飛去因兜大門口，恁那隻牛跟去偷吃草，阮的狗在因兜客廳 扒輪斗，咱攏去了了！
《肥豬齁齁叫》格林文化出版社出版
《肥豬齁齁叫》〈土狗仔〉
土狗仔，六支鬚，水溝掠魚溜，魚溜滑滑滑，爬起溝仔頂撿肉骨，肉骨油油油，吃甲嘴鬚結歸球。
《紅龜粿》〈鳥仔和狗仔〉
一隻鳥仔，飛到門口，挵著狗仔。狗仔吠，鳥仔哮，鳥仔哮，狗仔走。
《肥豬齁齁叫》格林文化出版社出版、《紅龜粿》信誼基金出版社出版
《肥豬齁齁叫》〈黑貓黑漆漆〉
黑貓黑漆漆，暗時行路人看無，在厝尾頂賴賴走，喵喵喵，阿婆阿婆，驚一咧，嚇一跳。
《紅龜粿》〈戇烏貓〉
戇烏貓，頭殼底石頭；不食魚，欲食柴頭；不掠老鼠，欲掠猴；暗時講欲 曝日頭。
《肥豬齁齁叫》格林文化出版社出版、《紅龜粿》信誼基金出版社出版
